Thomas Rothfuß: Mir henn des alles mitbezahlt...
Mir wisse, uff ere große Reis‘, ernährt ma sich uff an’re Weis‘,
weil jeder denkt un au no prahlt, mir henn des schließlich mitbezahlt!
Ja morgens gibt es scho ganz früh, ab sechs die erschte Kaffee-Brüh,
dann geht’s sofort un au salopp, zum Frühstücksbüffe‘, hopplahop!
Zum Start en Sekt-Orosch, ole, dann Fleischsalat, dezu en Tee.
A Rührei, Speck, Würschtle mit Käs‘, de Mage danzt a Polonäs‘,
während I uff’s Toaschtbrot wart‘, beschtell I uff de Speisekart‘,
für Mittags un für Obends glei, die linke Seit‘ , I b in so frei!
Frühstück isch rum, die Kellner geh‘n, I kann neme, s’isch kurz nach 10!
Em Elfe bin I wieder fit, heb au a bissle Appetit,
un tu oifach zum Üwerbrücke, zwei fette Wurschbrötle verdrücke,
die heb I mir, ganz raffiniert, beim Frühstück heimlich schnell no g’schmiert!
Dann denk‘ I mir, bei vollem Mund, jetzt dauert’s noch a ganze Stund‘,
dann werre’d Pfanne rausgekarrt, weil jeder mit de Hufe scharrt!
Un dann geht’s los mit 2-3 Suppe, sie steh’n in Schlange un in Gruppe,
Fisch oder Fleisch, Pommes un Reis, die Hauptsach‘ viel un net zu heiss,
weil mein strapazierter Mage muss jo no e Eis vertrage!
Getreu dem Satz: Wer raschtet roschtet, wird no en Fruchtdessert gekoschtet,
dann schlepp‘ I mi mit viel Genüg‘ un vollem Bauch dort uff mei Lieg‘,
laut schnarchend mach‘ I dann ganz brav, mein wichtige Verdauungsschlaf!
Ach Gott , es isch jo scho halb vier, de Kaffee dampft un I lieg‘ hier,
grad heit do wollt i doch versuche, von dem frische Himbeerkuche,
nix wie los, mein Gaume flattert, 3 Stückle heb I noch ergattert!
Dät mein strapazierter Mage en kloine Wodka jetzt vertrage?
Un hinnerher, so denk I mir, für mein Durscht e großes Bier!
Mei Uhr sagt mir 18 Uhr 30, die Kellner sin scho me als fleißig
un wieder hock I, ganz zentral, als erschter do im Speisesaal!
De kloine Kellner kommt scho g‘rennt, die Karte-Auswahl in de Händ‘,
Der war mir dann au glei sympatisch un dann heb I systematisch,
mir den Teller vollgebuttert un me durch die Karte g’futtert!
Un nach 2 Stund‘ dann des Malheur, die Laaferei war mee als schwer,
I wollt‘ me net scho wieder lege, sondern a bissle me bewege,
un heb ma denkt, was I jetzt mach‘, I spiel‘ oifach a Portion Schach!
Dann hat sich’s ganze Esse g’setzt, es war scho spät un s’langt a jetzt!
Noch schnell zum Mitternachts_Büffe‘, bevor I in mei Koje geh,
3 Frikadelle – un dann weg, I schlepp‘ me keuchend über’s Deck
un schmeiss‘ me stocksteif wie a Brett, in de Kabin glei uff mei Bett!
Jetzt muss I no de Wecker stelle, denn der muss nämlich zeitig schelle,
weil ab sechse morge früh, do gibt’s die erschte Kaffeebrüh‘!