Manfred Kaiser: Kuhläd'rjack-Ballade
Blost in die Fanfare, brennt's Feierwerk ab,
zapf't Bierfässer o un schpilt laude Musik,
v' rwurscht'lt die Sau un schtecht Geggerle ab,
haut Flaischkäs ufs Brot, zweiehalb Finger dick.
Singt wischte Trinklieder un lockere Fraue
sin eizulade zu däm b'sondere Fescht.
Erlaubt sin au Rilpser un laudes V'rdaue,
hard bestroft wird, wär's Trinke v'rgesst.
Refr.:
Ja heit isch do 30-de Johresdag
von mir un meinere Kuhläd'rjack,
die von mir erlegt un am Krage gepackt
vor 30 Johr bei d'r Schlussv'rkaufsjagd.
Zur Feier des Dages hab ich ihr schbendiert,
Knepf, neies Fudd'r fir die alde Haud,
jetzt schtrahlt se mich o un isch fein renoviert,
wie frisch getraut ich un mei Läd'rbraut.
Es feiern mit Freinde un Wäggefährte
un die hän mitgebrocht als Ehregäscht,
ihre Liblingsjacke, au ziemlich v'rjährte,
so schauk'lt sich's hoch zu me „Altjackefescht“
Refr.
Gulaschsupp, Bier un vom Budding do Rescht,
Sau'r kraut, Wirschtle mit Senf obedruf,
macht so ä Kuhläd'r erscht haltbar un fescht,
des nimmt mei Liebling jack alles noch uf.
Un blost än Wind kalt durch unsere Zeite,
dann knepf ich se zu un sie schitzt mich un wärmt.
V'rschtändnisvoll isch se, dänn sie isch ä Waide,
die fir mei Bauch- un- Ländeschpeck schwärmt.
Refr.
Jetzt kruscht'ler mer uralde G'schichte raus,
die mir mit unsere Jacke erläbt.
Bei Hochzeite un beim Laicheschmaus,
hat meine mich eig'hilt, isch an mer gekläbt
Jede Schramm an ihr un alle Falde
schtehn fir ä kloine Erzählung fir sich.
Mei Läd'r un ich, mir bleibe die Alde,
mei gude Rindshaut, „ich liebe dich“.
Refr.