Brigitte Köck: Nemme schee du misse ...

Irgendwann bisch soweit
vielleicht noch net heit
awer irgendwann schpür‘s
nix meh mache, wege de Leit

Zeig Rückgrat un Haldung
geh koin Schritt nach rechts
schlawenzl um niemand rum
wie e Kriechtier em Dreck

E Rückgrat kann breche
un die Seel dann glei mit
jetzt hasch’s schun vagesse
was Oaschtand isch

Z’rück bleibt en dodliche, biegsame Worm
ohne oin ehrliche Fraind
der em griene Salad vun Macht
en hernloser Labbedudl bleibt

Sei en menschliche Mensch
ohne de vabiege zu misse
umarm mol wieder richtig
un net blos rechts/links end Luft nei kisse

Zeig ehrlich dei Haldung
fa was du schtehsch
sei frei em denke
un geh uffrichtig dein Weg

Du musch nemme schee du
sei oifach du selbscht
awer b’halt die em Blick
die ma net bezahlt mit Macht oder Geld

Nemme schee du misse
awer herzlich umarme un lache
un wenn de krumm legsch
blos um mol wieder en Borzlboam zu mache

Oifach nemme schee du misse
s’dut gut ... so schee
so schee frei sei ... ih schpür’s
ganz dehoim sei

bei mir