Otto Arnold: Vum Esse
Also friher, mit dem Esse kontschd de Luxus grad vergesse, denn nachem Grieg verkochd' mer hald, was mer griegd aus Feld un Wald.
Ufm Dorf un in de Schdadt
hat jeder annerschd Kohldampf ghat.
Des kann mer awer schlecht beschreiwe, drum lasse mer des Thema bleiwe.
Schaffe un Hungre hod dominierd, mer hod sich hald so arrangschierd.
Der Kluh isch awwer, ihr kenned des lese: domols wäre mir gsinder gewese.
Vielleichd isch bissle ebbes dro.
Es war noch weit zum Luxus no.
Brod hemmer ghad, un e bißle meh Ruh, un ganz wichdich: a e Ärwed dezu.
Die Kinner esse, dassze waggse.
Do brauchd mer koi so siese faxe.
En Keidel Brod rund um de Laib, schee digg, die Margarine druff, un Gselz, - mit Gligg -. Des war des Mahl, wo Gräfde schaffd.
Mier henns nohrd ergedwie jo graffd.
Es werd dann langsam schun viel besser, mer mergd des dann jo a als Esser.
Noch Schweineflaisch un Rind un Giggel griegd uns die Induschdrie am Wiggel.
Es werd gemänufägscherd un gemischd, bis nix meh so wie vorher isch.
Es werd verpackd un dadum-gschdembeld, en Barkod isch uff all dem Grembl.
So hot uns dann mit aller Macht
die Werdschafd zum Verbraucher gmachd.
Wo mer hert, dun sie erkläre, mir solle uns gesund ernähre.
Gsundhaid isch e groß Kabiddel, des ernährd viel weiße Kiddel.
Wer glaabd, er wär so g'sund wien Knorre, isch nor ned rechd geteschded worre.
Doch wie's a sei: mid gsundem esse kenndsch du die Dokter grad vergesse.
„Was isch denn gsund?“ willsch du jetz wisse. Do wersch e bissle forsche misse.
Die Beggerzeidung dud dir kund, blos Backware seie gsund.
Die Megsderzeidung, dass es waisch, moint: werklich gsund isch blos des Flaisch.
Reformhaus, Abodegerzeidung,
mit ihre riesiche Verbreitung
wisse: du brauchsch Feddseire-drei rechd hoch,
Kalzium, Andioxidanzie, un Fidamine noch.
Alloi die BIO-Nahrung garandierd, daß du ned sunschd wersch ogeschmierd.
Mit dem Koche duhsch de schwer.
Wo griegsch blos die Rezebde her?
Wenn in en Biecherlaade laafsch, isch ganz egal, wells kochbuch kaafsch.
Wenn se vergleichsch, bisch werklich bladd, weil’s oiner vum annere abkupferd had.
So werd ewwe jeder Mischd, aa wenn er widerlegd schun isch, weidergewe ohne Schgrupel.
Haubdsach isch, es rolld de Rubel.
Vergrauld werd oim sei Leibgerichd, wemmer sich nach de Werbung richd.
Du wersch nerwehs un lasch de schdresse. Heer uff mit dem gesunde Esse!
Vergess, was die Reklam bezweggd, un ess jetz endlich, was der schmeggd.